News Portal

‘द भ्वाइस अफ नेपाल थ्री’ को उपाधि किरण गजमेरलाई

ईसगरमाथा संवाददाता काठमाण्डौं, २४ साउन
२४१ पटक
काठमाण्डौं, २४ साउन

‘द भ्वाइस अफ नेपाल थ्री’ को उपाधि किरण गजमेरले प्राप्त गरेका छन् । उपाधिसँगै उनले नगद २५ लाख रुपैयाँ समेत पाएका छन् । प्रमोदबाट फाइनलमा प्रवेश गरेका उनि फाइनल जित्न सफल भएका हुन् ।

यसैगरी टीम राजुबाट बाग्लुङकी तारा श्रीष मगर, टीम दीपबाट दार्जीलिङका आर्यन तामाङ र टीम तृष्णाबाट ज्वाला फाइनलिस्ट भएका छन् । यी तीनैजना फाइनलिस्टले द भ्वाइसको ट्रफी पाएका छन् । एक सातासम्म दर्शकले गरेको भोटका आधारमा यो निर्णय भएको हो ।

एसएमएस र अनलाइन मार्फत संसारभर रहेका नेपालीहरुले उनीहरुलाई भोट गरेका थिए । शनिवारको एपिसोडमा यी चारै जना प्रतिभाहरुले आफ्ना प्रस्तुतिहरु दिएका थिए ।
टिम प्रमोदको प्रतिस्पर्धीले लगातार दोश्रो पटक नेपालकै नम्बर १ रियालिटी शोको टाइटल जितेका छन् । यसअघि पनि टिम प्रमोदबाटै राम लिम्बुले यो उपाधि जितेका थिए ।

यो रियालिटी शो हिमालय टीभीमा हरेक शुक्रबार र शनिबार बेलुकी ८ बजेबाट प्रसारण हुँदै आएको थियो । किरण गजमेरले उपाधि जितेपछि आफूलाई विश्वभरबाट भोट गर्ने सबै नेपालीलाई धन्यवाद दिए । किरणले आम नेपालीको यो अपार मायाको लागि सधैं नै ऋणी भएको बताएका छन् ।

 

प्रतिकृया दिनुहोस्